Góðir farþegar, verið velkomin heim.

Ég er komin heim frá Álaborg og ég var að hugsa í gærkvöldi hvað það er alltaf notalegt að heyra þessi orð  þegar maður er lentur, þó að maður hafi bara verið nokkra daga í burtu.  Ég hef nú bara heyrt þetta hjá Icelandair minnir mig.  Ætli þetta sé svona í öðrum löndum?

En á miðvikudagskvöld hófst ferðalagið. Við fórum 5 manna hópur sölumanna og hópstjóra frá Íslandi, allt konur að þessu sinni (dreifingaraðilarnir tveir voru farnar á undan).   Við fórum með næturflugi til Köben, komum þangað 06 og þá tók við lestarferðalag til Álaborgar sem tók fimm og hálfan tíma.  Við sváfum nú mislítið, ég held að ég hafi náð kannski einum og hálfum tíma alls í svefni þá nótt.  Fimmtudaginn höfðum við alveg fyrir okkur.

Þegar við vorum búnar að koma okkur fyrir á Quality hotel Aalborg þá fórum við allar sjö saman í Aalborg Storcenter, það þurfti auðvitað að versla aðeins.   Um kvöldið fórum við svo í miðbæinn og enduðum á að borða á stað sem heitir Den stygge Krympen, þar voru alveg risaskammtar af mat.

Föstudagsmorgun byrjuðum við með morgunverðarhlaðborði sem var mjög gott og girnilegt. M.a. með ekta dansk liverpostej heitri  og alls kyns gúmmilaði.  Síðan fór ég ein í leiðangur að skoða húsið sem ég bjó í þegar ég var fimm ára.  Pabbi var í tæknifræðinámi þarna og ég hafði bara ekki komið síðan við fluttum þaðan.  Grönlandstorv 5, ég rölti um og tók nokkrar myndir sem ég set inn seinna.  Ég hitti svo Áslaugu, Nönnu og Laueyju í HM niðrí bæ hvar annars staðar?

Síðan drifum við okkur upp á hótel í ráðstefnugallann,  við frá Íslandi allar í eins bolum og eins á litinn buxum, rétt náðum hádegismatnum áður en þetta byrjaði.

Það var alveg rosalega heitt í salnum enda voru þarna 1300 manns frá öllum Norðurlöndum og Eystrasaltslöndunum, fjöldi þeirra sem er að selja Tupperware í þessum löndum er 14.700,- þannig að þetta náði ekki 10% sem þarna voru. Til þess að komast á svona ráðstefnu er alltaf sett ákveðin söluskilyrði.   Eins og venjulega var mikið um heiðranir og nýjungar kynntar og forstjóri TW Nordic og annað starfsfólk tók mikinn þátt í alls kyns skemmtiatriðum og það var til dæmis mjög flott þegar allur salurinn var fenginn til að syngja samtaka.   Síðan eru alltaf kynntar nýjungar, nýr bæklingur kynntur og við fáum alltaf eitthvað af nýju Tupperware gefins.

Um hálfátta var svo galadinner og hljómsveit. Ég komst ekki í galafordrykk að þessu sinni, og engin frá Íslandi, aldrei að vita hvort ég verði með í febrúar þegar árleg hópstjóraráðstefna verður haldin.

Við Freydís fórum allavega síðast, og við Áslaug þarsíðast. Það sem er skemmtilegt líka við það er að safna Silfurstaupunum merktu (segir maður annars staup um svona há glös) jæja allavega.  Þetta var mjög  skemmtilegt kvöld og við enduðum kvöldið með smá partýi uppá herbergi.

Laugardagsmorgun vaknað kl. 8 eftir fimm tíma svefn, uhumm, við Áslaug vorum nú frekar þreyttar, svo þegar við komum niður í morgunmat var bara mjög margt búið af hlaðborðinu!!!! og við áttum að mæta klukkan 9 í Aalborghallen en það er stóri salurinn í ráðstefnuhúsinu.  Um kvöldið var síðan Fun night, en það er árlegt grímuball á þessari ráðstefnu og þemað í ár var Fly with me.   Við vorum þyrlur. Aðrir hópar voru t.d. fiðrildi, nornir, blómálfar, randaflugur, kalkúnar, leðurblökur og m.a.s. fljúgandi kýr.

Sunnudagurinn fór svo í ferðalagið til baka, lest kl 13:10 frá Álaborg, flug 22:30 frá Kastrup og var svo lent eitthvað fyrir miðnætti að íslenskum tíma.

 

Hér fyrir neðan er smá myndbrot frá Jubilee en ég sést ekki, sit svo ofarlega.

Athugasemdir

[Markús frá Djúpalæk, 18.8.2008 kl. 22:52]

Kæri farþegi, velkomin heim

[Sigríður Þórarinsdóttir, 18.8.2008 kl. 23:39]

Takk kærlega fyrir

[Jóna Á. Gísladóttir, 23.8.2008 kl. 12:09]

þessi orð hlýja mér líka alltaf um hjartarætur.

Gott að þetta heppnaðist allt svona vel.